Lěwica dobyła
Berlin (SN). Dohromady 166 443 dźěći a młodostnych je minjeny tydźeń při wólbach pod 18 lětami (U18) swój hłós za wólby noweho zwjazkoweho sejma wotedało. Wot wčerawšeho wuslědk předleži. Najsylniša strona pola wolerjow pod 18 lětami je Lěwica z 20,8 procentami hłosow. Po tym sćěhuje SPD ze 17,9 procentami. Unija je 15,7 procentow docpěła, nimale runje telko dósta AfD z 15,5 procentami hłosow. Zelenych woleše 12,5 procentow dźěći a młodostnych. Strona za škit zwěriny dósta 3,8 procentow, FDP a BSW stej z 3,4 procentami najmjenje hłosow docpěłoj.
W Sakskej, Saksko-Anhaltskej a Durinskej pak bu AfD najsylniša móc. W Sakskej hłosowaše 32 proc. dźěći a młodostnych za AfD. Při wólbach U18 so na zwučene wašnje jenož druhi hłós woteda. Wuslědki njejsu reprezentatiwne.
Demokraća w Syriskej wuzamknjeni
„Rozmołwy su njepřiměrjene“
Europske kraje na wjeršku w Parisu njepřezjedni
Paris/London/Berlin (dpa/SN). Nastupajo prašenje, hač měli k zaručenju móžneho přiměra měrowe jednotki do Ukrainy pósłać, njejsu kraje Europy na wjeršku wo wójnje w Ukrainje přezjednosć docpěli. Zwjazkowy kancler Olaf Scholz wopisowaše diskusije po zetkanju jako iritěrowace a přezažne a kritizowaše, zo rěča Europjenjo wo móžnych wuslědkach měrowych rozmołwow bjez wobdźělenja Ukrainjanow. Dotal dźě so tajke ani hišće wotměli njejsu. „To je chětro njepřiměrjene“, Scholz wuzběhny. Francoski prezident Emmanuel Macron bě na informelne wuradźowanje tež statnych a knježerstwowych šefow z Wulkeje Britaniskeje, Italskeje, Pólskeje, Španiskeje, Nižozemskeje a Danskeje kaž tež načolnikow EU a NATO přeprosył.
Lud abo mjeńšina?
W Choćebuzu problemy zymy dla
Derjeměće wohrožene
To a tamne (18.02.25)
Nimo tankowanskeho turizma při němsko-awstriskej mjezy je nětko dalšeje přičiny, sej do susodneho kraja jěć a fenki lutować. W Awstriskej dóstanješ za kašćik z 20 prózdnymi blešemi wot spočatka februara 3,90 eurow wjace hač w Němskej. To so hižo čile zwužitkuje, ludźo zdźěla z wjacorymi kašćikami přez hranicu jězdźa. Štož zda so być hrabnjenčko za přetrjebarjow, je za piwarcow katastrofa, dokelž maja dale a mjenje prózdnych blešow z wikowanja k dispoziciji. Nětko pytaja potrjecheni za rozrisanjom problema.
Klanka je znowa zasadźenje policije při kanalu w Berlinje zawinowała. Ludźo běchu tam wčera přizjewili, zo su we wodźe mortweho wuhladali. Na městnje so wukopa, zo jednaše so wo klanku. Na fotach bě klanka na zamjerznjenym kanalu widźeć. Wona wupadaše kaž dźěćo.
Swjate městna nabožinow
Berlin (B/SN). Kóžda nabožina ma městnosć z centralnym wuznamom. Za islam je to Kaaba, kwadratny dom w Mekka. Indiske město Varanasi, při rěce Ganges, je najwažniše za hinduizm. Křesćanam je cyrkej ze „swjatym rowom“ w Jerusalemje najwuznamniša. Židźa sej wosebje „murju žałosćenja“ w Jerusalemje česća. W Indiskej je za buddhistow městnosć Bodhgaya z templom najswjećiša.
Kongres młodźiny
Frankfurt n. M. (B/SN). Prawiznik Benjamin Graumann zwěsći sylnje přiběracu hidu přećiwo židam. Centralna rada židow přihotuje tuž pod hesłom „Our Turn“ wot 27. februara do 2. měrca młodźinski kongres w Hamburgu. Tam chcedźa dorosćacej młodźinje w židowskich wosadach perspektiwy, šansy a přikłady za zwoprawdźenje swójskich žiwjenskich cilow w globalnych krizach rozłožić.
Prawa dźěći wobkedźbować
Na Bauma spominali
Drježdźany (dpa/SN). Na swjatočnym zarjadowanju wčera w Semperowej operje bu Europske sudnistwo za čłowjeske prawa z Drježdźanskim měrowym mytom počesćene. Na spožčenju spominachu zdobom na zemrěteho politikarja FDP Gerharta Bauma, kotryž bě z měrowym mytom wusko zwjazany a je tež tónkróć před ludźimi rěčeć chcył. Jeho narěč na swjatočnosći přečitachu. 92lětny Baum, kotryž pochadźeše z Drježdźan, je w nocy na pjatk w Bonnje zemrěł.
Rozmołwy bórze zahaja
Tel Aviv/Gaza (dpa/SN). Jednanja wo pokročowanju přiměra w Gazaskim pasmje so hišće tutón tydźeń na njeznatym městnje zahaja. Tole zdźěli wosebity pósłanc USA Steve Witkoff. USA, Egyptowska a Katar běchu so wo prěni přiměr prócowali, kotryž so 1. měrca skónči. Tuchwilu je hišće 73 zastajencow w rukach Hamas, při čimž drje je 36 z nich hižo mortwych. Hač zmóžni so dalša faza přiměra, hišće jasne njeje.
Centrumaj za ćěkancow
