Kijew/Brüssel (ČŽ/K). Ukrainske wonkowne ministerstwo je raznje přećiwo tomu protestowało, zo su so někotři čěscy politikarjo na połkupje Krim na oficialnych ruskich zarjadowanjach wobdźěleli. Tak wone kritizuje, zo staj zapósłanc Europskeho parlamenta Jaromír Kohlíček (KSČM) a senator Jaroslav Doubrava (hibanje Severočeši) ze swojim delegaciskim přewodom w Sewastopolu paradźe wójnskich łódźi Čornomórskeho namórnistwa přihladowałoj a k tomu so ze zapósłancami krimskeje Dumy zetkałoj. W Kijewje maja tohorunja za njepřiměrjene, zo je čěska delegacija, kotrejž po rozprawach krimskich medijow tež městopředsyda KSČM Josef Skála přisłušeše, na połkupje wopytała Bachčisaraj, Jaltu a dalše města.

Ukrainske wonkowne ministerstwo woznamjenja wizitu čěskich politikarjow jako „njezakonsku kročel“, a skedźbnja zdobom na to, zo móhli so jeje nawjedowarjam napołožić wotpowědne sankcije. „Štóž Ruskej pomha jeje złóstnistwa wusprawnjeć, stanje so chcyjo nochcyjo z gratom w rukach Krjemla“, ministerstwo w protesće zwuraznja.