Marek Krawc rozprawja wo aktualnje rozjimanych temach w Čěskej

Praha. Češa so nadpada Ruskeje na Ukrainu dla starosća. Tak čitachu minjeny tydźeń na titulnych stronach Lidovych Novin „Ruská invaze – Mame se bát? (Ruska inwazija – dyrbimy so bojeć?). Njedźelu protestowaše w Praze wjace hač 80 000 ludźi přećiwo inwaziwnej politice najwuchodnišeho europskeho stata pod hesłom „Podpěrujemy Ukrainu“. Na protestnej akciji je čěski ministerski prezident Petr Fiala ruskeho prezidenta Wladimira Putina namołwił, wójnu na Ukrainje zakónčić, a chwaleše sej krute hospodarske a towaršnostne chłostanja přećiwo Ruskej. Ukrainski wulkopósłanc Jewhen ­Perebyjnys dźakowaše so Čecham za jich solidaritu a spěšnu pomoc.