JTVG Koblicy – Viktoria Worklecy 3:1 (25:20, 20:25, 25:15, 25:19)

Za Viktoriju Worklecy zasadźeni: Anita Bierbaum, Marina Köhler, Stefanie Köhler, Christin Opicec, Jennifer Otto, Constance Pötschke, Tadeja Šefrec, Anja Šmidtowa, Kathrin Spiesec; trenarjej: Daniela Kralec a Stephan Mühl

Prěnja sadźba bě jara wurunana. Wobě mustwje dypkowaštej přez połožene bule. Tež jednotliwe wuspěšne bloki wjedźechu k wjerćenju taflički na woběmaj stronomaj. Přez njejasnosće w přiwzaću běchu Worklečanki nuzowane, při dypkowym stawje 7:10 wo timeout prosyć. To přinjese Kobličanki z rytmusa a hosćom poradźi so, předskok na 11:12 skrótšić. W dalšim přeběhu hry pokazachu so nahladne nadběhi a wuchowanske akcije. Přiwšěm pak wobchowachu sej hosćićelki dale rytmus a wutwarichu předskok znowa wo tři dypki. Druha třećina prěnjeje sadźby bě mocyměrjenje na jenakim niwowje. Worklečankam poradźi so, sej jednotliwe dypki přez sylne naběhi zdobyć, njezamóchu pak za wokomik so ze zastatka wuswobodźić. To nuzowa jich při dypkowym stawje 18:22 wo dalše přetorhnjenje prosyć. Naposledk pak mějachu prěnju sadźbu 20:25 na Kobličanki wotedać.