Marek Krawc rozprawja wo aktualnje rozjimanych temach w Čěskej
Praha. Minjeny kónc tydźenja zahajichu wjacore srjedźišća za sněhakowanje w Čěskej zymsku sezonu. Wuměnjenja za woblubowany zymski sport su z hač do 80 centimetrami sněha wosebje w Jizerskich horinach, Kyrkonošach a Rudnych horinach idealne.
Po informacijach instituta za slědźenje měnjenjow Kantar je jenož 16 procentow naprašowanych wobydlerjow Čěskeje spokojom z dźěłom tuchwilneho knježerstwa. Za čěski kabinet je to najhórši wuslědk wot lěta 2021. Za jara špatne ma samo 80 procentow Čechow politiske połoženje w swojim kraju. ANO, strona bywšeho premierministra Andreja Babiša, by při wólbach z 34,5 procentami hłosow jasna dobyćerka była. ODS, strona tuchwilneho premierministra Petra Fiale, by 12 procentow hłosow nažnjała a druha najsylniša strona była. Piraća bychu sej z 11,5 procentami třeće městno a prawicarska SPD z 10 procentami štwórte městno zawěsćili. Čłonojo strony Top 09 bychu so jenož z pjeć procentami spokojić dyrbjeli.
