Prawicarski zapósłanc Pólsku na swjedźenju chanuka wohańbił

Waršawa. Wosrjedź politiskich podawkow w zwisku ze změnu mocy w Pólskej wudyri politiski skandal, kotryž je mjezynarodnu nahladnosć kraja chětro wobškodźił a zamołwitych wohańbił.

Na swjatočnosći parlamenta minjenu wutoru, na kotrymž wopomina w přitomnosći zastupnikow wosady židow jich tradicionalny swjedźeń chanuka, je zapósłanc prawicarskeje strony Konfederacija Grzegorz Braun z wohnjohašakom swěčki na židowskej menorje hasnył. Za pultom rěčeše Braun wo „dźiwim akće satanizma“ swjedźeń chanuka nastupajo. Chanuka dopomina na zběžk židowskeho ludu přećiwo Grjekam w lěće 164 do Chrystusa a na „dźiw“, zo bě so tehdy sydomručny swěčnik cyłe wosom dnjow swěćił.

Antižidowski njeskutk Brauna je nablaku mjezynarodnu rozhorjenosć zbudźił. Israelske wulkopósłanstwo we Waršawje je runje tak protestowało kaž wulkopósłanc USA w Pólskej Mark Brzezinski.