Pólski prezident Duda weto zapołožił – zjawno-prawniske sćelaki rozpušćene

Waršawa (dpa/SN). W Pólskej traje ćahańca mjez nowym knježerstwom Donalda Tuska a wotwolenym konserwatiwnym knježerstwom PiS wo kontrolu zjawno-prawniskich medijow dale. „Powěsćowe sćelaki měli funkciju spjelnić, pokazać, što je realita, dalokož móžno, bjez komentara“ rjekny nowy wiceminister za digitalizowanje Michal Gramatyka wčera jako zaměr. W rozmołwje z priwatnym telewizijnym sćelakom wón zdobom připowědźi, zo měli zjawno-prawniske medije „chětro wotbyć“.

Dźeń do toho bě kulturny minister Bartlomiej Sienkeiwicz formalnje připowědźił, zjawno-prawniski telewizijny sćelak TVP, pólske radijo a powěsćernju PAP rozpušćić, dźěłowe městna pak zachować. Minister reagowaše tak na weto prezidenta Andrzeja Dudy. Tón bě plany knježerstwo nastupajo financowanje zjawno-prawniskich z třomi miliardami złotych (690 milionow eurow) za lěto 2024 wotpokazał.