Marek Krawc rozprawja wo aktualnje rozjimanych temach w Čěskej

Praha. Tysacy ludźi, mjez nimi wjele wukrajnikow, běchu minjenu njedźelu nowe lěto 2024 na Praskim Staroměšćanskim kaž tež na Wjacławskim naměsće powitali. Eva Kropáčová, rěčnica Praskeje policije, zdźěli póndźelu rano, zo su wobydlerjo čěskeje stolicy započatk noweho lěta měrniši swjećili hač lěto do toho. Policija trjebaše jenož někotrych bijeńcow dla zakročić a někotrych swjećacych z pjenježnymi pokutami pochłostać, dokelž běchu njedowolene praskotaki wotpalili. Třinaće ludźi dowjeze wuchowanska słužba do chorownje, sydom ludźi zranichu so w zwisku z praskotakami.