Etat Pólskeje za 2025 předwidźi njesłyšany podźěl za wójsko kraja

Waršawa. Pólske knježerstwo ministerskeho prezidenta Donalda Tuska je etat kraja za lěto 2025 předstajiło. Budget, kiž su předwčerawšim, srjedu, w sejmje prezentowali, je we wjacorym nastupanju rekordny.

Wusahowacy je podźěl, kotryž chcedźa za wójsko wudać. Na wšěch 45 miliardow eurow chce knježerstwo za zakitowanje kraja a za nakup nowych brónjow nałožić. Hišće wjace, 55 miliardow eurow, planuje wudać za polěpšenje strowotnistwa. Mnohim je to jasne znamjo, zo chcedźa tak předewšěm kritikarjow změrować.

Premier Tusk wopodstatnja rekordne wudawki za wójsko z nadpadowej wójnu Ruskeje přećiwo susodnej Ukrainje. Tole Pólsku runjewon nuzuje, zakitowanje kraja zesylnić. Waršawa takle samo wot USA žadany zaměr dweju procentow nutřkokrajneho bruttoprodukta za brónjenje daloko překroči: Podźěl wučinja nětko 4,7 procentow, štož tež w mjezynarodnym přirunowanju wusahuje. Runje tak njesłyšany je wobjim kredita, z kotrymž chce kraj wšo tole financować. Deficit wučinja 5,5 procentow – to je wjace hač 70 miliardow eurow.