Marek Krawc rozprawja wo aktualnje rozjimanych temach w Čěskej

Praha. Póndźelu wječor su policisća w ramiku wobchadneje kontrole na awtodróze blisko Mělníka nakładne awta přepruwowali. Naraz zwěsćichu, zo chowa so w připowěšaku 30 ćěkancow. Někotři z nich samo ze strachom ćeknychu. Pozdźišo informowachu policajscy zastojnicy na nowinarskej konferency, zo ma wjele z ćěkancow chutne strowotniske problemy a zo je jedna žona po puću ze swojeho kraja žiwjenje přisadźiła. Ćěkancy a wójna běštej hłownej temje wěstotneje konferency „Globsec“, kotraž wotmě so zašły kónc tydźenja w Praze. 2 000 ­hosći ze 70 krajow, mjez nimi wjele po­litikarjow, zaběra so wosebje z wójnu w Ukrainje. Po słowach čěskeho wonkowneho ministra Jana Lipavskeho, postaja Ukraina sama, kak zasadźuje čěske brónje w boju přećiwo Ruskej. Na druhim boku pak njedodawa Čěska Ukrainje daloko sahace brónjowe systemy, kotrež móža nadpadnjenemu krajej na kóncu samo hišće škodźić. Lipavský pak je wo tym přeswědčeny, zo měła Ukraina tež tajke brónje wužiwać, dokelž ma prawo, so zakitować.