Ukrainski prezident z prašenjemi žurnalistow so rozestajeć dyrbjał
Waršawa. Ukrainski prezident Wolodymyr Zelenskyj je předwčerawšim, srjedu, do Waršawy přijěł. Jeho mjeztym třeći wopyt po zahajenju wójny njeběchu wěstotnych přičin dla připowědźili. Na lisćinje oficialnych rozmołwnych partnerow stejachu prezident Andrzej Duda, ministerski prezident Donald Tusk kaž tež Waršawski wyši měšćanosta a kandidat za zastojnstwo prezidenta Rafał Trzaskowski. Na nowinarskej konferency chwaleše hósć z Kijewa skutkownu pomoc Pólskeje na dobro Ukrainy w boju přećiwo ruskim nadpadnikam. Wot Europskeje unije pak sej žadaše, zo trójce telko bróni produkuje kaž dotal, zo njeby jenož Ukrainje pomhała, ale so zdobom sama hrožacemu ruskemu nadpadej wobarała. Konferenca wotběža w diplomatiskej atmosferje.
