Póst Drježdźany –
Viktoria Worklecy 3:0
(25:21, 25:23, 25:20)
Dwaj tydźenjej po poražce pola načolnika Motor Mickten wjedźeše hrajny plan wolejbuloweje sakskeje klasy Worklečanskich muži znowa do krajneje stolicy, tónraz k Póstej Drježdźany.
Njeznaty optimist bě pjatk do hry w sportowych pokiwach w SN móžnosć naspomnił, zo móhli so Worklecy z dobyćom 3:0 abo 3:1 na 4. městno tabulki sunyć. Tuta nadźija pak so hižo po prěnjej hrě dnja rozbi, kotruž běchu póštownicy 3:1 přećiwo Košicam dobyli. Přiwšěm lubješe hra štwórteho přećiwo pjatemu tabulki napjatosć a wolejbulowe chłóšćenki. Hnydom na započatku móže so rjec: napjatosć – haj, chłóšćenki – ně. Bohužel widźeše horstka přihladowarjow chětro nerwoznu hru z mnohimi zmylkami na woběmaj bokomaj. Mjeztym pak wobkedźbowachu přeco zaso spektakularne wuchowanske akcije a wysokoklasowe nadběhi, a to na woběmaj bokomaj.
