Mjeztym je hižo z tradiciju, zo přewjeduja so w Ralbicach mjez hodami a nowym lětom halowe koparske turněry serbskich juniorowych mustwow starobnych klasow F, E a D. Tak přeprosychu sej Ralbičanscy Sokoljo na tute tři wubědźowanja koparske cyłki z Njebjelčic, Chrósćic, Pančic-Kukowa a Radworja. W modusu „kóždy přećiwo kóždemu“ wuhrawachu tak stajnje 15 partijow. Tule małe zjeće wšěch wubědźowanjow.

Turněr młodźiny F

Hač na koparjow Marijineje Hwězdy, kotřiž pak lětsa tež z młodźinu F scyła wonka na trawniku wo dypki njewojuja, wšitke mustwa dypkownje k prěnjemu turněrej do Ralbičanskeje ćěłozwučowarnje přichwatachu. Klóšterskich koparjow narunachu mali koparjo z Wóslinka/Skaskowa. Za někotrych z přitomnych hrajerkow a hrajerjow běše to prěni koparski turněr w hali a tuž bě wjeselo na mjezwočach jednotliwcow jara widźeć. Wšitke hry běchu napjate a dosć wurunane. Žana partija so z wjac hač třomi wrotami rozdźěla njeskónči. Zasłuženy dobyćer turněra běchu na kóncu Chróšćenjo, wosebje dobreje defensiwy dla.

Kónčny wuslědk:

1. Chrósćicy   8:2 13

2. Ralbicy běli  9:4 11

Chróšćenjo třeći króć dobyćerjo – smědźa sej pokal zdźeržeć

Po dwěmaj lětomaj přestawki přeprosychu sej Worklečenjo 30. hodownika zaso na tradicionelny halowy turněr wo pokal gmejnskeho zwjazka CDU do tamnišeje sportownje. Přeprošenju běchu mustwa z Róžanta, Noweje Wjeski, Serbskich Pazlic, Chrósćic, Pěskec a Worklec sćěhowali. W prěnjej stafli přesadźištej so mustwje Worklecy młodźina II a Worklecy ženjeni do połfinala. W druhej stafli wuwojowachu sej Chróšćenjo a Pěskečenjo tiket za semifinale. Tak nastupichu w prěnim połfinalu Chróšćenjo přećiwo ženjenym Worklečanam a w druhim połfinalu Pěskečenjo přećiwo druhemu mustwu Worklečanskeje młodźiny. Chróšćenjo zamóchu połfinale z 4:0 jasnje za sebje rozsudźić. Dalšu hru wo zaćah do semifinala mustwo z Pěskec snadnje z 2:1 doby. W małym finalu sej Worklečanska młodźina II potom třeće městno zdoby. Hra skónči so z 5:2 za hosćićela.

,,Strowe nowe lěto a njech­ so wam wšike waše přeća a předewzaća spjel­nja“, to přeju wam, lubi čitarjo našeje póndźelnišeje sportoweje kolumny, w mjenje sobustawow Sportoweje jednotki Widźał-Słyšał-Napisał lěta 2023. A slubju wam, zo budźemy so stajnje prócować wěrjepodobne přinoški napisać, tež hdyž so pola někotrych hdys a hdys poslednje słowo druhdy ,,wuměni“. Potajkim žane fake news!

Wěrne nažel je, zo zemrě před něšto dnjemi drje najznaćiši swětowy kopar Pelè. W poslednich dnjach mnozy wo nim rozprawjachu a na njeho spominachu. Sym raz za tym pytał, čehodla rěkaše Pelè runje Pelè? Cyle jasne drje so to dopokazać njemóže, ale w swojej awtobiografiji pisa sam, zo bě wobdźiwar ,,Bilè“, wrotarja mustwa Vasco Sao Lorenco. Měješe pak ćeže při wurjekowanju mjena a tak nasta z ,,Pilè“ skónčnje ,,Pelè“. Připódla prajene, znaju serbskeho koparja z přimjenom ,,Pile“. Zwažu sebi prajić, zo z njeho žadyn Pelè njebudźe.

Silwesterske běhi w Budyšinje

Na poslednim dnju lěta 2022 přewjedu so w Budyšinje 55. silwesterske běhi. Zamołwići Budyskeho lochkoatletiskeho sportoweho towarstwa Čerwjeno-běli 90 maja tři čary w poskitku: 2,6; 5,4 a 10,8 kilometrow. Start a cil wšitkich běhow budźetej zaso w stadionje na Młynkec łuce, a to wot 9.30 hodź. Přizjewjenja su tež jutře na městnje hišće móžne.

Liški hraja dźensa doma

Po poražce 3:5 pola EV Landshut srjedu su so Łužiske lodohokejowe liški zaso do Běłeje Wody wróćili, zo bychu dźensa po seriji třoch poražkow zaso raz dypkowali. Do Łužicy přijědźe štwórty z DEL2 EC Bad Nauheim. Budźe to prěnja z třoch domjacych hrow w běhu jednoho tydźenja.

30.12.  19:30  Łužiske liški –

  EC Bad Nauheim

03.01.  19:30  Łužiske liški –

  LP Crimmitschau

06.01.  19:30 Łužiske liški –

  Wjelki Selb

Wukubłaja nowych sudnikow