Ê Zbožowny tón, njemjerzacy so wěcow dla, kotrež njehodźa so změnić. (To je mi hižo wjele čuwow zalutowało.)

Ë Mój start do samostatneho předewzaćelstwa njebě runjewon róžojty. W lěće 2003 přewzach Serbsku kofejownju w Budyskim Serbskim domje, do kotrejež sym tójšto inwestowała. Wobrot pak njebě tajki, zo bych kóšty wurunała. Wosebje­ a-la-cart-hosćo na wječorach pobrachowachu. Njeličach z tym, zo wokoło Serbskeho domu po wječorach žane žiwjenje njeje, ćim bóle w starym měsće. To je mi někotre bjezsparne nocy wobradźiło. Běch tuž nuzowana za druhimi pućemi zwyšenja wobrota pytać a natwarich sej syć cateringa. Přiwšěm wobrot za personalne kóšty a podruž njedosahaše. Tak kofejownju zawrěch, ale bě mi žel derje fungowacu cateringowu syć spušćić. Mějach poskitk, Radworsku „Meju“ za poměrnje moderatnu podruž přewzać. Cateringowu syć móžach tak dale posłužować a tež „Meju“ ze žiwjenjom pjelnić.