Schrift vergrößern
Pohlad na dwór Budyskeho tachantstwa, kotryž je lětsa 24. smažnika jubilej 800lětneho wobstaća swjećił. W twarjenju naprawo su rumnosće tachantskeje pokładownje, muzeja ze sakralnymi hódnotami. Nalěwo widźimy zachodny portal do tachantstwa, kotryž bu 1755 twarjeny. Wuměłsku pychu stworił bě serbski rězbar baroka Jakub Delenka (1695–1763).SN/Hanka Šěnec
Na najwyšim blaku Budyšina, 219 metrow nad mórskej hładźinu, pozběhuje so tachantska cyrkej swjateho Pětra, wot lěta 1980 konkatedrala Drježdźansko-Mišnjanskeho biskopstwa. Wot 1523 słuži wulki Boži dom dwěmaj konfesijomaj – třećinu wužiwa romsko-katolska wosada, dwě třećinje ewangelsko-lutherska. Najwjetše sakralne twarjenje Budyšina je najstarša a najwjetša simultana cyrkej Němskeje a najskerje cyłeje Europy.
Postawu swjateje Marije pod křižom a dalše cyrkwinske drohoćinki wuhladaš w muzealnej tachantskej pokładowani. Foto: Uwe Söder
Portal Budyskeho tachantstwa nasta w lěće 1755. Jeho pycha je wot rězbarja Jakuba Delenki, 1695 w Słonej Boršći rodźeneho.
Sakralne symbole pyša tachantski portal, na kotrymž je tež wopon biskopa Jana Józefa Wójskeho.
