W słowakskich Košicach pomjatnu taflu za serbskeho wučenca Jana Boka znowa wotkryli
Serbski wučenc w Słowakskej
Jan Bok pochadźeše z delnjołužiskeho městačka Wětošow, hdźež bě so 1569 jako syn překupca narodźił. Po studijach teologije, filozofije a swobodnych wuměłstwow w Frankfurće nad Wódru a we Wittenbergu skutkowaše čas žiwjenja w Hornjej Madźarskej, dźensnišej Słowakskej. Spočatnje bě gymnazialny wučer w Prešovje, po tym zastawaše wšelake wysoke zastojnstwa w Košicach, mjez druhim jako sudnik a měšćanosta. Wón zemrě 1621 w Uherskim Brodźe, hdźež je tež pochowany.
Ze swojim wobšěrnym skutkowanjom zańdźe Jan Bok do stawiznow jako wusahowacy pedagoga, wučenc, basnik, politikar a humanist europskeho formata. Mjezynarodnje znaty je jako Bocatius, štož je łaćonska forma jeho swójbneho mjena, kaž bě za jeho čas mjez wučenymi z wašnjom.
Česćenja Jana Boka
Hač do dźensnišich dnjow Jana Boka česćuja. Tak dopomina na njeho wot lěta 1999 w ródnym Wětošowje mjedźana tafla na wonkownej muri Serbsko-němskeje dwójneje cyrkwje.
