Zetkanje z wuměłskim nawodu muskeho chóra a serbskim wučerjom

Je wutoru wječor krótko do sedmich. Na dworje Konječanskeje žurle steja mužojo. Pod njej je burska stwa, hdźež so woni – su to čłonojo Serbskeho muskeho chóra Delany – tydźensce zetkawaja, zo bychu swoje spěwy w swójskim repertoiru kwalitatiwnje dale polěpšili a nowe twórby nazwučowali. Wot 2019 maja za swojeho wuměłskeho nawodu 31lětneho wučerja za serbšćinu a hudźbu na Budyskim Serbskim gymnaziju Mateja Kowarja. „Wón z Budyšina sem na probu přijědźe. Měješe pak dźensa hišće zhromadźiznu a so prócuje dypkowny być. Dirigent dźě stajnje na dypkownosć dźiwa. Haj wón je jara disciplinowany a sej to tež wot nas přeje“, praji Daniel Wje­sela, kiž je hižo wjele lět z čłonom chóra a w tenorje spěwa. Ralbičan słuša k zdónkej spěwneho ćělesa. „Matej Kowar je muž połny elana, štož so tež na nas spěwarjow wuskutkuje“, spěwar dodawa. Jeho słowa na to pokazuja, zo chórisća swojeho młodeho dirigenta akceptuja, sej jeho česća a spěwne zwučowanja ­połnje přijimuja.