Minjeny štwórtk běše wosebity dźeń za čěski lodohokej: Oceláři Třinec su lodohokejowi ­mištrojo sezony 21/22. W šestej hrě finalneho koła přesadźi so čerwjeno-běłe mustwo přećiwo Sparće z Prahi a doby seriju ze 4:2. To je wězo wuspěch. Za naspomnjeny wosebity dźeń wšak by to kusk mało było. To wurjadne na wonym 28. aprylu běše, zo je so to mustwu třeći króć zasobu poradźiło. Mišterski hattrick potajkim. A to je w lodohokeju bjezmała něšto wosebite. Třinec wšak měješe cyłu sezonu chětro stabilne wuslědki a ma wurjadne mustwo, tak zo słušachu hokejisća z industrijoweho město na kóždy pad k fawo­ritam. Hrajerjo z bliskeho Libereca po­dachu so hižo po štwórćfinalu do lěćneje přestawki. Woni podležachu pozdźišemu finalistej z Prahi. Sezona Liberečanow wšak běše porno tej trójneho mištra kaž jězba po seklojtej čarje: njewobstajne horje a dele, z někotrymi wulkimi dźěrami do hłubin tabulki. To wšak běše tež za fanow nowa situacija, wšako běše w minjenych lětach nimale „normalne“, zo so Liberec za kónčne koło kwalifikuje. Tuž damy so w přichodnej sezonje překwapić ...