Widźał, słyšał, napisał (16.09.24)
Montag, 16. September 2024
154
E-Paper: Serbske Nowiny 180
-
Schriftgröße
Schriftgröße verkleinern
Schrift vergrößern
Awtor dźensa Pětr ŠołtaLael Wilcox je to zaso jónu zdokonjała: Minjenu srjedu dojědźe wona k Buckingham-studni w Chicagu a zlěze z posměwkom w mjezwoču z kolesa. 37lětna bě mjenujcy runje nowy rekord nastajiła – Guinnessowy swětowy rekord žonow za najspěšniše wobjěće swěta z kolesom. Wuspěšna ultrakolesowarka a bikepacking-wubědźowarka absolwowaše swoju monumentalnu jězbu w 108 dnjach, 12 hodźinach a 12 mjeńšinach. Wona přetrjechi tak dotalny rekord 124 dnjow a 11 hodźin, nastajeny 2018 wot šotiskeje kolesowarki Jenny Graham. Jako bě Wilcox Chicago 26. meje rano w sedmich wopušćiła, nadźiješe so 110 dnjow pozdźišo so nawróćić. Zo pak bě spěšnišo po puću, je poprawom typiske za Alaskačanku, kotraž je hižo mnohe druhe dołhočarowe kolesowanske rekordy nastajiła, mjez nimi dobyće při TransAm 2018 (jězba přez cyłe USA). Na swojej turje wokoło swěta absolwowaše Wilcox přerěznje 281 kilometrow wob dźeń. Najdlěši běše dźeń 98, na kotrymž zmištrowa 436 km, zo by strašnej horcoće w Kaliforniskej wućekła. Na kóncu jónkrótneho dyrdomdeja je ultrakolesowarka 29 196 km ze 192 024 wysokostnymi metrami wotjěła.
Veröffentlicht in
Widźał, słyšał, napisał
Bitte anmelden, um einen Kommentar zu posten
