We wulkich městach třěleja wobchody ze starymi trikotami kaž morcheje ze zemje, popstarojo wustupuja na swójskich koncertach w outfiće němskich koparskich ligistow a samo ludźo bjez direktneho zwiska ke kopańcy je w swobodnym času noša. Koparske trikoty njejsu dawno hižo wjac jenož fanowe artikle, ale moda. Zamołwići za tutón modowy trend, kotryž je w minjenych lětach ekstremnje přiběrał, su wězo w prěnim rjedźe wosoby zjawneho žiwjenja, kotrež tute w socialnych medijach noša. Ale tež wšitke wulke koparske kluby kaž na přikład Real Madrid, FC Bayern Mnichow abo FC Barcelona su dawno hižo „na ćah skočili“. Woni euforiju klewernje z tym wužija, zo kóždu sezonu nimo klasiskeho domjaceho a wonkowneho dresa tež hišće třeći trikot na wiki přinjesu. A dokelž to hišće dosć njeje, zwjetša tež hišće wosebity muster jenož za wěstu hrajnu dobu k tomu přińdźe.

Při tutej cyłej zahoritosći wokoło čwaka płatu sym so prašał, kak je trikot poprawom do kopańcy přišoł.