Njedawny 17. tajki wjeršk w Praze je rozmyslowanje wo poćahu Serbow k zetkanjam Sokołskeho hibanja wubudźił

Na 17. wšosokołskim zlěće wot 30. junija hač do 5. julija 2024 běchu znowa hosćo z mnohich krajow. Mjez něhdźe 20 000 Sokołami bě delegacija z Łužicy najmjeńša: W swjedźenskim ćahu po měsće bě za plakatom „Serbski Sokoł“ jeničce kwartet ze starostu Janom Hrjehorjom widźeć. Zo Serbja sylnišo zastupjeni njeběchu, zaležeše na paralelnje so wotměwacej Europeadźe, mišterstwje narodnych mjeńšin w kopańcy. Na prašenja kaž „Kak bě z ličbami wobdźělnikow na druhich zlětach, kak wysoka drje je cyłkowna ličba dotalnych wobdźělnikow a kak dołho scyła hižo Serbja na Wšosokołske zlěty jězdźa“, spytamy w slědowacym wotmołwić.

Serbja w čěskim Sokole zwučowali