Kóždy to hidźi, hdyž na awtodróze doprědka njeńdźe abo samo k haćenju wobchada dóńdźe. Zo móže to bjezdwěla tež dobre situacije wuskutkować, wo tym rozprawja bywši manager FC Energije Choćebuz Klaus Stabach: „Smy 1994 trenarja pytali. A dokelž wědźach, zo bě mój studijny kolega Ede Geyer runje bjez nadawka, sym so pola njeho naprašował. Trjebaše trochu časa k přemyslowanju. Jako jeho zazwonich, bě wón runje na jězbje k jednanjam z Čerwjeno-běłymi Erfurt. Woni chcychu jeho tež rady měć. Dokelž pak bě na awtodróze k haćenju wobchada přišło, rozsudźi so krótkodobnje zawróćić a do Choćebuza jěć, zo by so ze mnu zetkał.“

Dosć spěšnje buštaj sej přezjednaj, samo z mzdu 5 000 DM bě Geyer přezjedny a tak sta so jako šeftrenar w regionalnej lize wot sezony 1994/95. Dokelž bě sezona skerje słaba – Choćebuz bu jenož sedmy – chcyše so Saksa zaso zhubić. Po wšěm zdaću bě jeho nětko trochu powyšena mzda přičina, wostać w Delnjej Łužicy. W slědowacej sezonje zakónči Energija sezonu hižo na třećim městnje.