Mnohe jutrowne tradicije, kotrež w Serbach pěstujemy, su hižo prastare. Wot spočatka zašłeho lětstotka su fotografowki a fotografojo wone nałožki tež ze swojej kameru zapopadowali. W fotowym archiwje Serbskeho Instituta smy wšelake zajimawe motiwy nadešli. Herbert Franke na přikład je w lěće 1953 křižerja w Chelnje fotografował, kotryž konjej na stare wašnju hriwy ze słomu zapletuje (foto nalěwo). W Hornjej, srjedźnej a Delnjej Łužicy ludźo hižo jara dołho jejka walkuja. Najwjetši event w tutym zwisku pak je bjezdwěla walkowanje jutrońčku na Budyskim Hrodźišku. Fotograf Kurt Hajna pak je w lěće 1954 tež serbske dźěći w Delnjej Łužicy při pěstowanju tutoho nałožka ze swěcu wotmolował (foto naprawo horjeka). Dalši zajimawy motiw je Hajna 1952 w katolskej Hornjej Łužicy našoł, jako fotografowaše holcy při čěranju jutrowneje wody (deleka srjedźa). Tutón nałožk ma holcam a žonam rjanosć a płódnosć w nalěću a do přichodneho lěta zaručić. Ale mjelčeć při tym dyrbja, přetož „plapotata“ woda njeskutkuje.