Njewšědne zetkanje mjez Łužicu a galaksiju Galakos a zhladowanje na „Pupk swětnišća“

Srjedu tydźenja su so šulerjo 3. a 4. lětnika Chróšćanskeje zakładneje šule „Jurij Chěžka“ na tři dny do Njeswačanskeje młodownje podali. Nic pak na rjadownisku jězbu, ale na probowe lěhwo za musicalowy projekt „Pupk swětnišća“.

Maja wšelaku podpěru

Na produkciji za jewišćo wobdźěla so wšěch 74 šulerkow a šulerjow Chróšćanskeje šule. Ale nic jenož woni – šulska ­nawodnica Sabina Hejdušcyna, wučerka Alena Dubawina a šulska asistentka Lu­cija Bukowa, kotřiž tworja organizaciski team, wučerki Ludmila Donatowa, Si­mona Šěnowa, Hilža Kandtowa, Marija Wjeńkowa a Marija Ćěslina a dalši na šuli skutkowacy projekt podpěraja. Sabina Hejdušcyna je Załožbje za serbski lud dźakowna, zo Chróšćansku gmejnu a šulu financielnje podpěruje. „Tajka ideja trjeba tójšto pjenjez, zo by so zwoprawdźić hodźała“, wona rjekny, „a tež gmejna zwoprawdźenju projekta rozsudnje přinošuje.“ Redakcija Serbskich Nowin, Němsko-Serbske ludowe dźiwadło, Serbski ludowy ansambl a studijo LUCIJA steja kubłanišću po boku.