Peter Beer z Prěčec je nam poziciju „Pytarjow měra“ z Hornjeje Łužicy k wopytej madźarskeho ministerskeho prezidenta Viktora Orbána w Moskwje po­srědkował:

Oficialni Europskeje unije a NATO su rozhorjeni. My „Pytarjo měra“ smy to tež. Tale rozhorjenosć njeměri so přećiwo madźarskemu ministerskemu prezidentej Orbánej, ale přećiwo reprezentantam mjenowaneju zwjazkarstwow a „zapadnemu swěta“ docyła.

Tući stajnje zaso twjerdźa, zo njeje Orbán jako prezident Rady EU jednał, ale swojowólnje, bjez mandata jako statnik. Z tym je wón pječa „zhromadnu liniju zapada a Ukrainy“ podrywał.

Kajke pak su „zhromadne zajimy“? Kak chcemy mrěće hinak skónčić, hač přez rozmołwy a diplomatiju? Zo so EU a NATO sami wo jednanja njeprócuja, je dopokaz chudoby.