Wobydlerska iniciatiwa Stareje Darbnje na forum přeprosyła
Stara Darbnja (AK/SN). Łužica trjeba dołhodobnje jasny a zwjazowacy koncept, kak ma so z błótom železoweho hydroksida a ze sulfatami wobchadźeć, kotrež su přez brunicowe hórnistwo nastali. Byrnjež so Łužiska a srjedźoněmska towaršnosć hórnistwoweho zarjadnistwa (LMBV) wzdała železowy hydroksid do Starodarbnjanskeho jězora wodźić, njerěka to zběhnjenje. Tole je facit wčerawšeje zhromadźizny wobydlerskeje iniciatiwy w Starodarbnjanskej „Třělerni“. Něhdźe 40 zajimcow bě na přednoški a na forum přišło.
