Dwurěčnosć a serbska drasta w nakupowanišću samozrozumliwej

Budyšin (SN/mwe). Center na Žitnych wikach w Budyšinje je jako jedne z najwjetšich nakupowanišćow Hornjeje Łužicy ze 70 wikowarjemi dospołnje wućeženy, wšitke stejnišća su přenajate. „We wokomiku smy zasadnje spokojom, štož njeje samozrozumliwe“, centerowy manager Christian Polkow našemu wječornikej zdźěli. Wšako maja so wobchodnicy po cyłej Němskej w hospodarjenju z tójšto změnami rozestajeć. Dale a wjace kupcow sej twory internetnje skaza. „Wikowarjo maja so tuž na wěste rozdźělenje wobrota nastajić, štož mnozy hižo činja. We wikowanju je dźeń a wažniše kupcam lěpši serwis poskićeć“, Polkow rozłoži, „najebać wužadanja online-nakupowanja dla ma stacionarne drobnowikowanje dale swoje woprawnjenje.“