Skedźbnjeja na Łužicu jako stejnišćo přichoda za produkciju baterijow

Choćebuz/Klěśišća (SN/at). Wizija je naročna: We Łužicy we wulkim rozměru baterije za elektromobilitu zhotowić, a to nic jenož jako produkowanišćo, ale z dospołnym rjećazom tworjenja hódnoty! Słužić ma tomu wurjadna akcija #WelcomeTesla – to je swěcowy impuls –, kotraž wotměje so zajutřišim na Łužiskim motodromje blisko Klěśišćow. Tesla, ameriski zhotowjer elektroawtow, ze swojimi modelemi tež w Němskej zahorja.

„Naša akcija žněje dotal přemóžacy wothłós“, rjekny sobuiniciator Jens Taschenberger našemu wječornikej. Wjace hač 80 000 podpěraćelow je so hižo za tele widźomne znamjo nastupajo strukturnu změnu přizjewiło. Zajim z Hornjeje Łužicy je skerje wobmjezowany.