Budyska twornja zamóže dale žonop produkować a dodawać

Budyšin (SN/BŠe). Nimo wolija, muki a ketchupa słuša mjeztym tež žonop k požadanym wudźěłkam, kotrež sej ludźo w kupnicach nadměru wjele kupuja. Přičina za to pak njeje jenož wójna ­w Ukrainje. Tam měli ratarjo tele tydźenje žonopowe symjenja na polach wu­sywać. Tola ratarscy fachowcy wuchadźeja skerje z toho, zo koncentruja so tam bóle na to, za žiwjenje nuznje trěbne płody­ plahować. Hižo do nadpada Ruskeje na Ukrainu pak bě połoženje na wikach za žonopowe symješka napjate. Němska wšak dósta swoje symjo mjez druhim tež z Kanady. Tola suchoty w minjenym lěće dla su tam jenož połojcu popra­wom zwučeneho mnóstwa symjenjow nažnjeli. Hišće maja producenća dosć w swojich silach. Tola přiwšěm wěsća fachowcy hladajo na žonop přede­wšěm klětu ćežku situaciju, kotraž so hišće konkretnje posudźować njehodźi.