Wulkozawod TDDK, wotnožka japanskeju awtomobilneju dodawarjow w Nadróznej Hrabowce, ma wotnětka swójsku społnomócnjenu za serbske naležnosće: Carolinu Měršowu.

Nadrózna Hrabowka (SN). Z tym docpě angažement zawoda TDDK za spěchowanje serbskeje rěče a kultury dalši wjeršk. „Jako hornjołužiske předewzaće z wjace hač 950 přistajenymi chcemy tež našim serbskorěčnym kolegam wobswět skićić, kotryž jich pohonja, swoje rěčne tradicije z modernym hospodarstwom zwjazać,“ wuzběhny Ronald Juhnke, zastupowacy jednaćel TDDK.

We wobłuku małeje ceremonije, w kotrejž so japanske, němske a serbske elementy splećechu, powoła Yoichi Terao, jednaćel TDDK, serbsku sobudźěłaćerku Carolinu Měršowu za zamołwitu za serbske naležnosće zawoda.