SJ Njebjelčicy –

Zeleno-běli Sepicy 0:3 (0:2)

Zestawa domjacych: Nico Hahn – Jakub Šołta, Clemens Reinelt (42. Florian Domš), Nico Šuster (63. Anton Malaškin), Józef Matješk (63. Robert Lejnart), Christof Pawlik, Handrij Korjeńk, Ronny Hanuza, Roman Mjechela, Daniel Kral, Oliver Domš

Njedźelu běchu sportowi přećeljo ze Sepic z hosćom w Njebjelčicach. Dobyće přećiwo tabulkowemu susodej bě za Njebjelčanow na kóždy pad trěbne, zo njebychu so hišće hłubšo do tabulkoweje pincy dóstali. W prěnim połčasu widźeše nimale 100 přihladowarjow wurunanu hru ze šansami na woběmaj bokomaj. Hosćićeljo spytachu, přećiwnikej z wulkim ćišćom strašni być. Přez to pak stejachu chětro wotewrjeni. Přeco zaso běžachu do konterow, kotrež hosćo k 1:0 (10.) a 2:0 (35.) wužichu. Wrotar Nico Hahn domjacych přez někotre sylne parady před hóršim wuchowa. Před wrotami Sepičanow pobrachowaše hrajerjam SJN stajnje poslednja wola a tež trěbne zbožo. Čerwjene košle wuwostajichu jednu šansu po druhej.