Zwjazkowy hospodarski minister wčera předewzaći BASF a LEAG wopytał
Čorny Gózdź/Janšojce (SN/MiP). Hnydom dwaj terminaj w Delnjej Łužicy měješe zwjazkowy hospodarski minister Robert Habeck (Zeleni) wčera w swojej protyce zapisanej. W Čornym Gózdźu (Schwarzheide) wopyta dopołdnja zawod chemijoweho koncerna BASF, zo by tam prěni zhromadny europski centrum za produkciju kaž tež recycling baterijow sobu wotewrěł. Po słowach BASF „je centrum wažna kročel w zawrjenym kołoběhu produkcije baterijow w Europje – wot zběranja přetrjebanych baterijow a wróćozdobywanja mineraliskich surowiznow hač k znowawužiwanju tutych w produkciji nowych baterijow“. Nimo ministra Habecka a wjednistwa BASF běštaj tež ministerski prezident Braniborskeje Dietmar Woidtke (SPD) a wiceprezident Europskeje komisije Maroš Šefčovič na wotewrjenje přichwatałoj. Šefčovič wuzběhny wuznam noweho zawoda hladajo na pospochi rosćace baterijowe wiki, wosebje w času e-mobility. „Tež konkurenća zwonka Europy chcedźa na tute wiki.
