Štóž jeho na dworje zarjadnistwa bio­sferoweho rezerwata Hornjołužiska hola a haty w Stróži dožiwja, ma angažowaneho a komunikatiwneho młodeho muža před sobu. Čłowjeka, kotrehož je powołanje do našeje domi­zny wabiło. Julian Koepke je wot lońšeho 1. awgusta zamołwity za projekt biosferoweho rezerwata we wobłuku změny strukturow. „Sym swój masterowy studij na Wysokej šuli za naslědne wuwiće Eberswalde zakónčił, jako dóstach wupisanje woneho dźěłoweho městna do ruki“, powěda 33lětny. Z biosferowym rezerwatom w serbskej sydlenskej kónčinje měješe hižo 2020 we wobłuku studentskeho projekta činić. „Korony dla njejsmy na městnje byli, ale naš nadawk jenož online a z telefonatami wobdźěłali. Z tutych rozmołwow mějach pozitiwny zaćišć wo regionje“, Julian Koepke powěda.

Požadanje bě wuspěšne. Loni w juniju bu projekt z němskim mjenom „WildNatour“ přizwoleny, 1. awgusta je absolwent zastojnstwo nastupił. „Sym takrjec do zymneje wody skočił.“ Dotal njeje swój rozsud, hić do dospołnje njeznateje kónčiny, wobžarował. Wón bydli w Budyšinje, stare město jeho wobkuzłuje.