Burja wobaraja so masiwnje přećiwo planam zwjazkoweho knježerstwa
Budyšin (SN/BŠe). Štóž dyrbješe dźensa rano do Budyšina, Zhorjelca abo Drježdźan na dźěło, trjebaše chwile a sćerpnosć. Ratarjo po cyłej Sakskej protestowachu přećiwo planam zwjazkoweho knježerstwa. Wone chce subwencije za agrarny diesel krok po kroku přikrótšić a skónčnje dospołnje šmórnyć. Hněw na knježerstwo zwurazni so na plakatach z nadpismom „Preč z amplu“.
Podłu zwjazkoweje awtodróhi A4 su burja ze swojimi traktorami nimale wšitke zajězdy hižo wot ranja w pjećich blokowali. Mjez protestowacymi běchu tež ratarjo ze serbskich předewzaćow, mjez druhim z Haslowa, Radworja a Chrósćic. Woni zaraćachu na přikład zajězdy na awtodróhu Horni Wujězd a Porchow. Tež na wotbóčkach A4 Budyšin-wuchod a zapad su burja wobchad haćili, tuž wutworichu so dołhe rynki wozydłow. Štóž spytaše rano z awtom přez Židow do města jěć, dyrbješe tam runje tak sćerpny być.