Tež bjez brunicy njepobrachuja dźěłowe městna, ale fachowcy

Budyšin (SN/BŠe). Po zawrjenju wagonownje w Niskej z 180 sobudźěłaćerjemi a stejnišća Maja w Kulowje z 450 přistajenymi so ludźo starosćeja, zo hišće dalše industrijne zawody Hornju Łužicu wopušća abo stejnišća zawru. Nalada w zawodach na wuchodźe Sakskeje je so w februaru pohubjeńšiła, wuchadźa tohorunja z wobchodneho klimoweho indeksa slědźenskeho instituta ifo. Tež wobchodne wočakowanja předewzaćow na wuchodźe Sakskeje su so znižili. Nalada je tuž z 88,5 dypkami špatniša hač loni samsny čas, hdźež wučinješe hódnota hišće 94,6 dypkow.

Hospodarsko politiske ramikowe wuměnjenja su so minjene lěta jasnje pohubjeńšili, informuje Drježdźanska industrijna a wikowanska komora. Zawody nimaja žanu planowansku wěstotu a stabilne wuměnjenja. Sakske hospodarstwo ma tuž cyle jasne žadanja na politikarjow. Běrokratija ma so pomjeńšić, energijowa a wobchadna změna realistisce wusměrić, powabki za inwesticije wuhotować, zawěsćenje fachowcow forsěrować a wučba w předmjetach MINT měło w kubłanju priorita być.