Choćebuz (SN/BŠe). Předewzaće Łužiska energija a milinarnje (LEAG) dóstanje wotškódnjenje we wobjimje 1,75 miliardow eurow, dokelž je w Němskej předwidźane, brunicu hižo wot lěta 2038 njewudobywać. Komisija EU je tomu wčera zelenu swěcu dała. Zwjazkowy hospodarski minister Robert Habeck (Zeleni) je wčera w Berlinje wuzběhnył, zo je to za potrjecheny region jara wažny rozsud. Z pjenjezami móža so přistajeni w přechodnej fazy socialnje podpěrać a wudawki za zawrjenje brunicowych jamow zapłaćić.

„Rozsud za nas zrozumliwy njeje. Sćěhi brunicowych jamow financować, kotrež je předewzaće same zawinowało, ma LEAG sama njesć. Zo stat nětko wotškódnjenje zapłaći, je absurdne“, wuzběhny René Schuster z wobswětoweho zwjazka Zelena liga. Dale wón tomu raznje znapřećiwja, zo budźe Łužica z toho profitować. „LEAG njeje łužiske wobydlerske hibanje, ale słuša oligarchej z wukraja. K rekultiwowanju swojich jamow je předewzaće tež potom prawnisce winowate, jelizo pjenjezy wot stata njedóstanje.“