Jendźelske narodne mustwo je kónc we wosmifinalu, při europskim koparskim mišterstwje w Němskej, snadnje wobešło. Po dołhim zastatku přewinychu faworizowani Britojo Słowaksku wčera 2:1 po podlěšenju. Jude Bellingham, w kónčnych sekundach regularneho hrajneho časa, a Harry Kane, bjezposrědnje po zahwizdanju podlěšenja, běštaj třělcaj „Three Lions“, kotřiž běchu w Gelsenkirchenje dołho přesłapjacy wustup pokazali. Při tym běchu wrota Bellinghama mólbje podobne. Z kopom z padom dozady přetwori wón bul do wrotow a zawěsći tak podlěšenje. Słowakojo běchu přede­wšěm w prěnim přechodźe jasnje lěpši mustwo a z wrotami Ivana Schranza (25. min.) zasłužbnje nawjedowali. Z přiběracym časom hry pak jich mocy wopu­šćichu, Jendźelska tłóčeše dale a bóle na wurunanje a zwjertnje partiju potom z dwójnym dyrom. W štwórćfinalu trjechi ­wubranka trenarja Garetha Southgate sobotu w Düsseldorf­je na Šwicarsku.