Tež serbšćina słuša do rěčow wulkoslědźenišća

Za Astrocentrum Łužica (DZA) dźěła hižo 72 ludźi z dźesać narodow. Mjez nimi su sobudźěłaćerjo z Pólskeje, Francoskeje, Chorwatskeje, Awstriskeje, Ukrainy, Turkowskeje, Marokka, Irana, Indiskeje a Němskeje. Nimale 20 z nich je łužiskeho pochada. Maćernorěčna Serbowka dźěła jako studentska pomocnica na natwarje DZA, jedyn promowend mjeztym serbuje. Jich dźěłowe městno je přewažnje Zhorjelc (90 procentow), někotři skutkuja w Drježdźanach, Wojerecach a wokolinje. To je nawoda komunikacije wulkoslědźenišća Stephan Witschas našemu wječornikej na naprašowanje zdźělił. Woni so natwarej institucije wěnuja, kotrejež iniciatorojo su so w lěće 2022 we wubědźowanju wo spěchowanske srědki za přichodnu hospodarsku a wědomostnu swětłownju we Łužicy přesadźili.