Młodostni dožiwjeja dobru zhromadnosć w susodnej Čěskej
Jetřichovice (SN/MiR). Pućować a so wočerstwjeć – to je hesło 25 młodostnych, kotřiž tuchwilu w čěskich Jetřichovicach, njedaloko Děčína přebywaja. Do prózdnin su woni hišće do 8 a 9. lětnika Budyskeho Serbskeho gymnazija kaž tež na wyše šule Radwor, Worklecy a Ralbicy chodźili. Nětko dožiwjeja woni wosebity prózdninski tydźeń. Nawodnica projekta je Michaela Młynkec, kotraž je referendarka wučerstwa na Budyskej Serbskej zakładnej šuli. Poboku ma wona wučerja Matthiasa Möllera kaž tež studentce wučerstwa Marie-Luise Matješkec a Alenu Bětnarjec. „Loni smy jako Serbske šulske towarstwo poskićeli rěčne lěhwo w pólskim Zakopanym“, koordinatorka SŠT Marlis Młynkowa powěda, „jězba pak běše z wosom hodźinami chětra dołha. Tuž smy so za tute lěto za alternatiwu bliže Łužicy rozhladowali, kotruž smy w Jetřichovicach nadešli.“ Byrnjež so młodostnym, kotřiž su loni w Pólskej sobu byli, přewšo spodobało, su woni lětuši poskitk, sej na čěski bok Sakskeje Šwicy dojěć, rady přewzali.