„Nowa kwalita hidy a zacpěwanja čłowjeka“ w Bórkowach

Bórkowy/Podstupim (SN/mb). Wotrjad „škit stata“ policije je 16lětneho wuslědźił, kiž je na internetnej platformje Instagram hroženja přećiwo wučerjomaj šěrił, kotrajž staj chroniske prawicarske podeńdźenja na šuli „Mina Witkojc“ w Bórkowach wozjewili. Max Teske a Laura Nickel staj mjeztym šulu wopušćiłoj. Kolegij šule je po wuprajenju wučerki Jette­ Schega přeco hišće „hłuboko pačeny“. Wona mjenowaše wotchad kolegow „wohańbjacy“ wuslědk „njejednanja, bjezpomocnosće a njepřećelskosćow“. W interneće su na „hońtwu“ přećiwo Teske­ a Nickel wołali, jeju wobraz na latarnjowe stołpy z namołwu lěpili so do Berlina zminyć, a prawicarscy starši su sej žadali, zo šula jim wupowědźi.