350 šulerjow w 1. lětniku wuknje serbsce

Drježdźany (SN/MiR). 40 500 dźěći w cyłej Sakskej dožiwi dźensa prěni šulski dźeń. Mjez nimi je 350 dźěći, kotrež wuknu serbšćinu po koncepće 2plus. Zašłu sobotu knježeše na wšitkich serbskich a serbšćinu wuwučowacych zakładnych šulach wulka radosć. Zastup do šule bě na kóždym kubłanišću derje radźeny. Za šulskich nowačkow, jich staršich, wučerjow a sobudźěłaćerjow běše to prěni wjeršk noweho šulskeho lěta 2024/2025.