Na centralnej olympiadźe serbskeje rěče wobdźěla so nimale 90 dźěći

Wodowe Hendrichecy (SN/MG). Je šěra srjeda kónc měrca. W twarjenju prózdninskeho kompleksa KIEZ Querxenland při němsko-čěskej hranicy haruja dźěći. Wšitcy chodźa na serbske wyše šule abo serbski gymnazij w Hornjej- respektiwnje na zakładne šule abo serbski gymnazij w Delnjej Łužicy. Dźěći su šulerki a šulerjo, kotřiž wubědźuja so na lětušej centralnej olympiadźe serbskeje rěče. Zarjadowar je na zwučene wašnje Serbske šulske towarstwo (SŠT) a tež organizatoriska wjednica je lětsa znowa Marlis Młynkowa. Ničo noweho lětsa njewuspytaja, wona powěda. Wšo po starym takrjec. Jenož tema je lětsa nowa: lěs.