Komuny maja často ćeže z imobilijemi a njemóža saněrowanje dopłaćić

Rakecy/Malešecy (SN/mwe). „Prózdne a začinjene hosćency su bohužel zrudny wobraz za Rakecy. Zwěsćam tež, zo njejsu mi aktualnje žane aktiwity znate, zo bych so znowawotewrjenja znajmjeńša jednoho z nich nadźijeć móhł“, zdźěli Rakečanski wjesnjanosta Swen Nowotny (CDU) na naprašowanje Serbskich Nowin. Wón njeje tón jenički, kiž mrěće hosćencow a žurlow na wsach swojeje gmejny wobžaruje. Wšako imobilije gmejnam zwjetša njesłušeja a jich mějićeljo zajim na gastronomiji nimaja, dokelž so to prosće njewudani. Tež něhdyši hosćenc w Stróži, Rakecam přisłušacym wjesnym dźělu, bu priwatnej wosobje předaty a steji­ hižo dlěši čas prózdny. „Po mojim wědźenju tam hižo žane gastronomiske zastaranje njeplanuja, ale chcedźa objekt skerje za bydlenske zaměry wužiwać“, rjekny Nowotny. Za jara kompleksne ma wón prašenje našeho wječornika za powšitkownym stawom imobilijow w gmejnje. „Zasadnje chcu rjec, zo je tu wjele objektow w dobrym stawje, zo pak budu při­wšěm imensne inwesticije za jich zdźerženje trěbne.