Slepo (SN/mwe). Wot spočatka lěta stej hosćenc a pensija „K hadźacej krónje“ w Slepom zawrjenej. Kaž Marion Mudra z gmejnskeho zarjada na naprašowanje Serbskich Nowin zdźěli, bě mějićel hosćenca Detlef Rölke wotnajenske zrěčenje z komunu k 31. decembrej 2016 wupowědźił. Slepjanska gmejna jako wobsedźerka domu je imobiliju znowa za wotnajenje wupisała, dotal pak so nichtó přizjewił njeje.

Nawodnica Serbskeho kulturneho centruma Slepo (SKC) Silwija Panošina wobžaruje, zo je hosćenc w njeposrědnim susodstwje za­wrjeny. Wšako bě jeho něhdyši mějićel tež mnohich wopytowarjow zarjadowanjow na žurli SKC přewšo derje ze słódnymi jědźemi a napojemi pohosćał. Zarjadowanja na žurli pak so po planje dale wotměwaja, tak na přikład ptači kwas SLA 28. januara w 16 hodź., hdźež pak ćělneho zastaranja njebudźe. Do toho, 25. januara, je dźěćacy ptači kwas na žurli. To so starši a pěstowarki wo kofej a tykanc staraja. Za zarjado­wanje 14. februara na Walentina pyta SKC z gmejnu hišće zastaranske rozri­sanje, kotrež pak na kóždy pad budźe.