Smječkecy (TŠ/SN). Njenapadnje, bjez signalow a z normalnej spěšnosću je wotydźenja wosebite lěkarske awto w Hamburgu po puću. Zastanje stajnje w samsnym času na samsnych městnach: při dwórnišću, při přistawje, w měsćanskich dźělach kaž St. Pauli – wšudźe, hdźež so bjezdomni zetkawaja. A kóždu srjedu sedźi w tymle awtobusu tež serbski lěkar dr. Stanij Nawka. Mobilna lěkarska słužba mjenuje so tale pomoc Carity we wulkoměsće, kotrež je w tym nastupanju po cyłej­ Němskej znate. Wčera pak běše Stanij Nawka w Smječkecach, zo by tam na přeprošenje Tadeja Šimana, nawody Domu swj. Jana, wo swojej čestnohamtskej słužbje rozprawjał, kotruž mjeztym hižo 20 lět wukonja.