Kulturne institucije w nošerstwje města Budyšina zhladuja na dobru bilancu minjeneho lěta. Kaž zdźěla měsćanske zarjadnistwo, wupokazuje statistika 2016, zo je wjace ludźi jich poskitki wužiwało.

Budyšin (SN/CoR). Ličba wopytowarjow w Muzeju Budyšin je loni wo něhdźe štwórćinu přiběrała. Dohromady bě jich 17 500, štož je 4 300 wjace hač w lěće 2015. Muzejowy nawoda dr. Jürgen Vollbrecht widźi přičinu za stupace wopytowarstwo w jara wuspěšnych wustajencach. Předewšěm přehladka z fotografi­jemi Rolfa Dvoraćeka je mnohich ludźi přiwabiła. „Mějachmy pak tež dobry wothłós na dalše poskitki, kaž na přikład za młodostnych a dźěći, ale tež za šulerjow a seniorow“, rozłoži dr. Vollbrecht.