Na nowolětnym přijeću prěni raz Myto Pětra Barta spožčili
Kamjenc (JK/SN). Dobra tradicija w Kamjencu je, počesćić čestnohamtsce skutkowacych wobydlerjow składnostnje nowolětneho přijeća wyšeho měšćanosty. Minjeny pjatk witaše Roland Dantz (njestronjan) čestnych hosći na žurlu Kamjenskeje radnicy.
W swojej narěči, z citatami Lessinga jako wulkeho syna města wudebjenej, bilancowaše Roland Dantz wuspěšne lěto na komunalnym a kulturnym, wosebje pak na hospodarskim polu. „Kamjenc hraje zaso jemu přistejacu rólu w sakskim zjawnym žiwjenju. To je tež zasłužba mnohich wobydlerjow, kotřiž čestnohamtsce na dobro komuny skutkuja“, hódnoćeše Dantz wuwiće něhdyšeho wokrjesneho města.
