Sirena wohnjowoborneho awta wuješe minjeny štwórtk po Pančicach-Kukowje. Njejednaše pak so wo alarm. Na te wašnje skedźbnichu wobornicy na to, zo přijědu z nowym hašenskim jězdźidłom do wsy. Pjatk wječor su je požohnowali.
Pančicy-Kukow (SN/MWj). To žno bě wosebity podawk, jako zetkachu so čłonojo dobrowólneje wohnjoweje wobory Pančicy-Kukow minjeny pjatk k lětnej hłownej zhromadźiznje w swojej gratowni. W njej steješe ze zelenej pletwu wobdate nowe hašenske jězdźidło typa TLF 3000, kotrež farar Daniel Dzikiewicz požohnowa. „To je prěnje nowe hašenske jězdźidło za Pančičansku woboru po přewróće, kotrež gmejnje słuša“, rozłoži nawoda gmejnskeje wobory Markus Richter. Dotalne awto typa Iveco běchu spočatk 90tych lět wot katastrofoweho škita wokrjesa přewzali, wone tež dźensa hišće Zwjazkej słuša. Swój W50 běchu něhdźe w samsnym času trjebany wot Wojerowskeje wobory přewzali. Za nowe awto wuda gmejna něhdźe 250 000 eurow, z toho dósta 117 000 eurow spěchowane.
