Narć (MFü/SN). Po jeno dźewjeć tydźenjach twarskeho časa smědźeštej tele dny sotře Nele a Vivien zhromadnje ze swojej přećelku Stellu-Luisu nowu kolesowansku šćežku podłu zwjazkoweje dróhi B 96 mjez zapadnej kromu Narća a sakskej krajnej wohnjowobornej šulu wotewrěć. Tak móža so holcy nětko lěpje wopytować, wšako šćežka hornju a delnju wjes zwjazuje. Ale tež wobornicy móža po treningu a wukubłanju do Narća abo Wojerec kolesować, praji nawoda wohnjowoborneje šule René Kraus. Nimo toho tójšto z jeho sobudźěłaćerjow w lěću z kolesom na dźěło jězdźi.