Budyšin (SN). Wodźerjo nakładnych a wosobowych awtow trjebaja w Budyšinje tuchwilu sylne čuwy. Wjacorych wjetšich twarnišćow dla dyrbja woni wokołopuće a dołhe rynki čakacych jězdźidłow na so brać. Ćežišća su dospołnje zawrjena Zeppelinowa, hdźež twarja nowy železniski móst, Tuchorska mjez Lubijskej a Weigangowej kaž tež Schillerowe zelenišća mjez Dwórnišćowej a NSLDź. Tež wokoło nowotwara kružneho wobchada na Schliebenowej je chětro wuske. Tam rjaduja wobchad tuchwilu z amplu. W prěnim tydźenju lětnich prózdnin pak budźe twarnišćo dospołnje zawrjene, dokelž­ chcedźa potom puć asfaltować.